Deu 11 | NdeIBE | STEP | Thandani uJehova wenu lilondoloze okwakhe, izimiso, imithetho lemilayo yakhe ngazo zonke izikhathi.

Deuteronomy 11

Thanda njalo ulalele uJehova

1 Thandani uJehova wenu lilondoloze okwakhe, izimiso, imithetho lemilayo yakhe ngazo zonke izikhathi. 2 Khumbulani lamuhla ukuthi abantwabenu akusibo ababubonayo njalo babazi ubukhulu bukaJehova uNkulunkulu wenu; ubukhosi bakhe, isandla sakhe esilamandla, lengalo yakhe eyelulekileyo; 3 izibonakaliso azenzayo kanye lakho konke akwenzayo phakathi kwelizwe leGibhithe, ezenza kuFaro iNkosi yeGibhithe laselizweni lakhe lonke; 4 lalokho akwenza kubutho leGibhithe, lasemabhizeni lezinqola zawo, ukuthi wakunqoba njani konke lokhu ngamanzi oLwandle oluBomvu mhla bexotshana lani, kanye lokuthi uJehova wabachitha baphela du. 5 Akusibantwabenu ababona alenzela khona enkangala laze lazafika lapha, 6 kanye lalokho akwenza kuDathani lo-Abhiramu, amadodana ka-Eliyabi wako-Rubheni. Lapho umhlaba owavuleka khona phambi kwabako-Israyeli wabaginya bonke kanye lezimuli zabo, lamathente abo lakho konke okuphilayo okwakungokwabo. 7 Kodwake kwakungawenu amehlo abona zonke lezi izinto ezazenziwe nguJehova.

8 Yikho-ke gcinani lilalele yonke imilayo engilinika yona lamuhla, ukuze lizuze amandla okuchapha iJodani liyelithumba lelolizwe,

9 njalo lihlale kulo isikhathi eside ilizwe iNkosi eyalinika okhokho benu lezizukulwana, ilizwe eligeleza uchago loluju.

10 Lelolizwe elizangena kulo lilithumbe alifanani lelizwe laseGibhithe, lapho elivela khona, lapho elalihlanyela inhlanyelo yenu lithwala amanzi nzima lithelela njengesivandeni semibhida. 11 Kodwa ilizwe elizachapha uJodani ukuze lilithumbe libe ngelenu yilizwe lezintaba lezihotsha ezinatha zigcwale ngamanzi ezulu.

12 Yilizwe iNkosi uNkulunkulu wenu alikhathalelayo, amehlo kaJehova wenu aphezu kwalo kusukela ekuqaleni komnyaka kuze kube sekupheleni kwawo.

13 Ngakho lingalalela ngokwethembeka imilayo yami engilinika yona lamuhla – ukuthanda uJehova uNkulunkulu wenu njalo limkhonze ngenhliziyo yenu yonke, langomphefumulo wenu wonke 14 ngalokho ngizanisa izulu emhlabeni wenu ngesikhathi salo, ekwindla kanye lasentwasa, ukuze lizuze amabele liwabuthe, iwayini elitsha kanye lamafutha.

15 Ngizamilisa utshani egangeni obuzadliwa zinkomo zenu, lina lizakudla lisuthe.

16 Qaphelani linanzelele ukuthi aliyikuhugeka lihlamuke likhonze abanye onkulunkulu libakhothamele. 17 Kungaba njalo ulaka lukaJehova luzavutha kini, njalo uzavala amazulu akhe ukuze kungabi lezulu elizakuna kuthi umhlaba wenu ungatheli izithelo, kuthi lina libhubhe masinyane elizweni elihle uJehova alinika lona. 18 Gcinani amazwi ami la ezinhliziyweni zenu lasengqondweni, abopheleni njengezimpawu ezandleni zenu liwabophele emabunzini enu. 19 Bafundiseni ngawo abantwabenu, lixoxe ngawo nxa lihlezi emakhaya enu kanye lalapho lihamba endleleni, lapho lilala phansi lanxa livuka.

20 Wabhaleni emigubazini yezindlu zenu kanye lasemasangweni enu, 21 ukuze kuthi izinsuku zenu kanye lezabantwabenu zande elizweni uJehova afunga ukulinika okhokho benu, kuze kube nini nxa umkhathi ulokhu ukhona ngaphezu komhlaba.

22 Nxa lingamhlonipha lilandele imilayo yami le engilinika yona ukuba liyilandele – ukuthanda uJehova wenu, ukuhamba ngezindlela zakhe libambelele kuye ngokuqinileyo, 23 ngalokho uJehova uzazixotsha zonke izizwe phambi kwenu njalo lani lizazemuka izizwe ezinkulu kulani, njalo ezilamandla kulani. 24 Yonke indawo elizanyathela kuyo izakuba ngeyenu: umhlaba wenu uzaqhela ukusuka enkangala usiya eLebhanoni, kusuka emfuleni iYufurathe kusiya elwandle olusentshonalanga. 25 Kakho ozamelana lani. UJehova uNkulunkulu wenu, njengokulithembisa kwakhe, uzaletha ukuthuthumela ngani lokulesaba elizweni lonke, ngaphi langaphi elihamba khona.

26 Khangelani, lamuhla ngifaka phambi kwenu isibusiso lesithuko – 27 isibusiso nxa lilalela imilayo kaJehova wenu engilinika yona lamuhla; 28 isithuko nxa lingalaleli imilayo kaJehova uNkulunkulu wenu njalo libe selitshiya indlela engilikhomba yona ngokulandela abanye onkulunkulu, elingabaziyo. 29 Nxa uJehova wenu eselifikisile elizweni eselingena kulo ukuba lilithumbe, kalibomemezela liseNtabeni iGerizimu lezozibusiso, kuthi liseNtabeni ye-Ebhali limemezele izithuko. 30 Njengoba lisazi, izintaba zingaphetsheya kweJodani, entshonalanga yomgwaqo okukhangele entshonalanga, eduzane lezihlahla ezinkulu zaseMore, elizweni lalawo maKhenani ahlala e-Arabha eduzane kweGiligali. 31 Seliseduze ukuchapha iJodani ukuba lingene lithumbe lelolizwe uJehova uNkulunkulu wenu alinika lona. Kuzakuthi nxa selilithethe selihlala khona, 32 libe leqiniso lokuthi liyalalela zonke izimiso lemithetho engilibekela yona lamuhla.